Претседателот Ѓорге Иванов денеска во Гостивар ги посети семејствата Узеири, Трпевски и Исмаили, чиишто членови се меѓу загинатите патници во вчерашната автобуска несреќа, што се случи на патот Скопје – Тетово, во близина на селото Ласкарци.
Како што информираат од неговиот кабинет, македонскиот претседател на семејствата и на блиските на загинатите им изразил најдлабоко сочувство за претрпената загуба.
Претходно, во општина Гостивар, Иванов присуствуваше и се обрати на Комеморативната седница во чест на загинатите граѓани во вчерашната тешка сообраќајна несреќа.
„Ова е тажен ден за Македонија, тажен ден за сите нас. Вакви настани да не ни се случуваат. Нека им е вечна слава“, порача претседателот во своето обраќање.
Во својот говор тој додаде дека во моментите на тага, треба тагата да ја споделуваме и да помислуваме на живите, односно како на најблиските да им се помогне да ги пребродат најтешките моменти во нивниот живот.
