Шпанскиот Врховен суд го одложи за следната недела сослушувањето на каталонските високи претставници, обвинети за побуна и порача дека Карлес Пуџдемон би можел да биде уапсен.
Вкупно 20 регионални политичари, вклучувајќи го и сменетиот каталонски лидер Карлес Пуџдемон беа повикани да се појават пред судот. Во прашање се 13 членови на сменетиот каталонски кабинет и шест членови на парламентарниот одбор.
Претседателот на Врховниот суд во Мадрид, Карлос Лесмес, истакна дека е реално да се издаде налог за апсење доколку некој не се појави пред судот.
„Кога некој не се појавува, а судијата го повика во Шпанија или која било земја на ЕУ, нормално е да се издаде налог за апсење“, истакна претседателот на Врховниот суд, Карлос Лесмес.
Претходно, членовите на сменетата каталонска Влада почнаа да пристигнуваат во два суда во Мадрид каде што требаше да се соочат со можни обвинувања за побуна поради прогласувањето независност од страна на Каталонија.
Сепак, соопштено е дека сослушувањата се одложени на барање на нивните адвокати.
Пуџдемон не се појави на сослушување. Белгискиот адвокат Пол Бекерт, кој го застапува Пуџдемон, изјави дека сменетиот каталонскиот лидер би требало да биде испитан во Белгија. Бекерт изјави дека Пуџдемон нема да се врати во Мадрид за да се појави на суд.
