Ново детско катче и моторички парк на Водно, обновени клупите, летниковците и осветлувањето

Макфакс

21/11/2026

15:00

167

Големина на фонт

а а а

Во Водно е уреден нов простор со детско катче и моторички парк, како и обновени клупи, летниковци и осветлување, со цел да се подобрат условите за прошетки и забава на скопјани. Град Скопје и градоначалникот Орце Ѓорѓиевски се посветени на подобрување на јавните простори за рекреација и одмор.

Водно доби уреден простор кај влезот кон жичарата, ново детско катче и моторички парк, а обновени се и клупите, кантите за отпадоци и летниковците. Активностите ги реализираше Град Скопје, од каде што информираат дека претходно бил асфалтиран и патот кон Средно Водно, каде што за првпат било поставено и ЛЕД-осветлување.

Градоначалникот Орце Ѓорѓиевски посочи дека со новиот моторички парк децата ќе имаат можност преку игра на отворено да ја развиваат рамнотежата и координацијата.

„За илјадници скопјани, Водно е дел од животот. Тука доаѓаме на прошетка по работниот ден, а за викенд тргнуваме по патеките со семејството и со пријателите. Затоа, за мене како градоначалник, заштитата на Водно и обновата на местата каде што скопјани се собираат и одмораат се меѓу најважните приоритети“, рече Ѓорѓиевски.

Тој додаде дека во изминатиот период биле уредени влезот кон жичарата и просторот околу него, изградено ново детско катче, а обновени биле и урбаната опрема и дрвените елементи.

„Ги обновивме клупите, кантите за отпадоци и летниковците, а дрвените елементи ги освеживме со нова боја“, посочи градоначалникот.

Ѓорѓиевски изрази благодарност до општествено одговорната компанија „Филип Морис“ за поддршката во уредувањето на просторот.