Христијан Мицкоски и министерот Тимчо Муцунски учествуваа на значаен состанок во Берлин организиран од германскиот канцелар Фридрих Мерц, каде ја потврдија поддршката на Македонија за постигнување праведен и траен мир во Украина преку дипломатски напори и координација со европските партнери и САД.
Премиерот, Христијан Мицкоски, заедно со министерот за надворешни работи и надворешна трговија, Тимчо Муцунски, во Берлин учествуваа на состанокот на Коалицијата на волните, посветен на актуелната состојба во Украина и напорите за постигнување мир.

Мицкоски објави дека на состанокот, организиран од германскиот канцелар била истакната важноста на засилените напори за завршување на војната во Украина.
Состанокот во Берлин
„На состанокот организиран од германскиот канцелар Фридрих Мерц беше истакната важноста на засилените напори за завршување на војната, како и потребата од заедничко дејствување на европските партнери и САД. Ја потврдивме поддршката на нашата земја за напорите за постигнување праведен и траен мир во Украина, преку дијалог, дипломатија и координација со нашите сојузници“, објави Мицкоски на социјалните мрежи.
Работна посета во Брисел
Мицкоски претходно објави дека во рамки на работната посета на Брисел, учествувал и на Форумот за проширување на Европската Унија, посветен на реформите, инвестициите и економскиот раст.
„Остварив и повеќе средби со претставници на европските институции, на кои ги отворивме прашањата од значење за европската перспектива на Македонија. Продолжуваме со активен дијалог, посветеност на реформите и застапување на државните интереси. Нашата цел е јасна Македонија да напредува кон Европската Унија!“, напиша Мицкоски.












