Општина Крива Паланка бара дипломатска поддршка од странските амбасади за итно и трајно решавање на проблемот со неконтролираното движење на добиток, кое создава безбедносни ризици и штети за локалното население и инфраструктурата.
Општина Крива Паланка денеска упатува допис до сите странски амбасади и амбасадори акредитирани во Република Северна Македонија. Со дописот ги информира за последиците од неконтролираното движење на повеќе од 1.000 грла крупен добиток на територијата на општината и бара нивна дипломатска поддршка за трајно решавање на проблемот.
Општината ги повикува амбасадорите во своите разговори со претставниците на Владата и на надлежните институции да го отворат ова прашање, да укажат на ризиците за граѓаните и да ја нагласат потребата од итно и координирано постапување.
Преку редовниот дијалог
„Преку редовниот дијалог со државните власти, амбасадорите можат да помогнат барањата на жителите на Крива Паланка да добијат внимание на највисоко институционално ниво. Нивното залагање може да придонесе за воспоставување директен работен дијалог меѓу Владата, надлежните агенции и Општината, со цел да се договорат конкретни мерки, да се утврди кој е одговорен за нивното спроведување и да се одредат рокови за постапување на терен.
Безбедност и штети
Добитокот без надзор се движи по улиците и патиштата, ја загрозува безбедноста на пешаците и возачите и предизвикува штети на земјоделските насади. Присуството на добиток и во дворот на средното општинско училиште дополнително ја нагласува потребата од итни мерки за заштита на учениците.
Поддршка и очекувања
Општина Крива Паланка е подготвена да ги стави на располагање податоците од општинскиот регистар на пријавени штети и да обезбеди локална поддршка за спроведување на договорените мерки. Граѓаните очекуваат јасен одговор од надлежните институции за тоа кога ќе започне постапувањето на терен и како ќе се обезбеди трајно решение“, се наведува во соопштението од Општина Крива Паланка.












