Во текот на изминатите 24 часа биле пријавени 15 случаи на семејно насилство низ целата држава, при што полицијата интервенирала и привела повеќе осомничени за физички напади и закани спрема членови на семејствата.
Вкупно 15 случаи на семејно насилство биле пријавени во изминатите 24 часа на територијата на целата држава, информира Министерството за внатрешни работи. Во дел од случаите полицијата интервенирала и привела осомничени за физички напади и закани врз членови на семејствата.
Меѓу пријавените случаи има напади врз сопруги, поранешни партнерки, родители, деца, но и врз други членови на семејството.
Во Охрид биле приведени двајца мажи на возраст од 31 и 34 години, по пријави дека физички ги нападнале своите партнерки. Во гостиварскиот регион полицијата привела тројца мажи на возраст од 32, 37 и 56 години. Едниот бил пријавен за напад врз поранешна девојка, другиот за напад врз сопругата, а третиот за упатување закани кон својот син.
Во струмичкиот регион биле приведени тројца мажи на возраст од 42, 59 и 62 години. Едниот бил пријавен за физички напад врз сопругата, вториот за агресивно однесување кон 91-годишната мајка и закани кон братот, а третиот за напад врз сопругата.
Полицијата интервенирала и во Велес, каде што биле пријавени меѓусебни физички напади меѓу поранешни партнери. Приведена била 33-годишна жена, откако поранешниот невенчан сопруг пријавил дека го нападнала, а подоцна и таа пријавила дека била нападната од него.
Во Куманово, пак, бил приведен 19-годишник по пријава дека физички го нападнал својот татко.
Во Скопје биле пријавени неколку случаи, меѓу кои напад врз сопруга во семејниот дом на подрачјето на Бит-пазар, физички напад врз 16-годишно момче од страна на неговиот татко, закани упатени кон родители од нивниот 18-годишен син, како и напад врз 52-годишен маж од неговата сопруга, која фрлала предмети кон него и употребила тврд предмет. Според пријавата, таа се обидела да ја нападне и неговата мајка.
Од МВР велат дека по сите пријави се преземаат мерки за целосно расчистување и документирање на случаите, по што ќе следуваат соодветни поднесоци.
Од Министерството апелираат граѓаните да не го премолчуваат семејното насилство и навреме да го пријавуваат. Секој што е жртва или има сознанија дека друго лице е изложено на насилство може да се обрати во најблиската полициска станица или да се јави на броевите 112 и 192.
