Организацијата Samoa Victim Support Group од Самоа е добитник на наградата на УНЕСКО „Маданџит Синг“ за промоција на толеранцијата и ненасилството за 2026 година. Свеченоста ќе се одржи утре, 16 ноември, во седиштето на УНЕСКО во Париз.

Според официјалното соопштение на УНЕСКО, организацијата е избрана поради 20 години работа против насилството. Нејзините програми опфаќаат поддршка на жртви, заштита на деца и активности во заедниците.

Засолниште и поддршка кога се најпотребни

Организацијата обезбедува бесплатна телефонска линија достапна цело деноноќие, засолништа, психолошка поддршка и правна помош. Меѓу нејзините програми е и Campus of Hope, центар за грижа и рехабилитација на жени, ранливи деца и лица со попреченост.

УНЕСКО наведува дека преку своите иницијативи организацијата поддржала повеќе од 5.000 жени, а безбедно засолниште обезбедила за повеќе од 4.000 млади жени. Во работата поврзува волонтери, локални заедници и институции.

Награда за толеранција на секои две години

Наградата „Маданџит Синг“ се доделува на секои две години, по повод Меѓународниот ден на толеранцијата. Таа изнесува 100.000 американски долари и оддава признание за значајни иницијативи во науката, уметноста, културата и комуникациите што го поттикнуваат ненасилството.

Основана е во 1995 година, во рамките на Годината на ОН за толеранција. Го носи името на индискиот уметник, писател и дипломат Маданџит Синг, поранешен амбасадор на добра волја на УНЕСКО.

Според најавената програма, утрешната церемонија во Париз ќе се одржи од 18:00 до 19:30 часот, по локално време, кое во овој период е исто како во Скопје.