Украинскиот претседател Володимир Зеленски го обвини рускиот претседател Владимир Путин дека предлогот за воспоставување привремена „хуманитарна мисија“ во Костјантинивка, на истокот на Украина, всушност е обид руските сили да влезат во градот и да го окупираат. Според него, таквиот потег би ѝ овозможил на Москва да го продолжи напредувањето кон Краматорск.

„Тоа е целосно примитивен потег, бидејќи на друг начин не може да го освои овој град“, изјави Зеленски пред новинарите, пренесува „Киев Индепендент“.

Тој смета дека евентуалниот прекин на огнот би им овозможил на руските војници да се прегрупираат и да заземат поповолни позиции во Костјантинивка и околината.

Зеленски рече дека предлогот му го пренеле американските преговарачи, на кои им го објаснил украинскиот став.

„Таму живеат исклучиво украински граѓани, а борбите се водат во самиот град. Ми го пренесоа тој предлог, а потоа рекоа: ‘Да, разбираме’“, изјави украинскиот претседател.

Стравува од руски продор кон други градови во Донбас

Костјантинивка се наоѓа во областа Доњецк и претставува една од пречките за руските обиди да ја преземат контролата врз остатокот од регионот. Поради тоа, контролата над градот е важна и од воен и од дипломатски аспект.

Зеленски нагласи дека Украина направила сè што е во нејзина моќ за евакуација на цивилното население од подрачјето.

„Ако ја предадеме Костјантинивка, нивните следни чекори ќе бидат другите наши градови во Донбас“, предупреди тој.

Според Зеленски, украинската страна им доставила на Американците список со седум или осум блокирани населени места во кои сè уште има цивили, меѓу кои и деца. Сепак, Русија не предложила хуманитарна операција за ниту едно од тие места.

„Зошто? Затоа што по Костјантинивка доаѓаат Краматорск и Славјанск“, рече Зеленски.

Москва предложила мисија додека борбите продолжуваат

Путин го изнел предлогот на 12 ноември во Москва, за време на средбата со специјалните американски пратеници Џаред Кушнер и Стив Виткоф.

Борбите во Костјантинивка продолжуваат, а Украина ги отфрли руските тврдења дека Москва има контрола врз градот. Украинскиот Генералштаб соопшти дека нејзините сили и натаму дејствуваат против руските пешадиски групи кои се обидуваат да навлезат во градот.

Советникот на украинскиот претседател, Дмитро Литвин, исто така ги доведе во прашање мотивите на Москва. Тој потсети на претходниот руски предлог за хуманитарна операција во Олешки, во Херсонската област, за кој тврди дека бил искористен за ротација на војниците и испраќање дополнителни сили под изговор на привремен прекин на огнот.