Кога станува збор за заштитата на срцето, најмногу внимание обично се посветува на контролата на холестеролот, одржувањето на крвниот притисок во здрави граници, физичката активност и избегнувањето на пушењето.

Сите овие навики се важни, но и малите одлуки што ги носиме меѓу оброците можат значително да влијаат врз здравјето, пишува „Parade.com“.

Грицкањето е една од оние навики за кои ретко размислуваме. Грицкаме во автомобилот, на работното биро, на каучот додека гледаме емисија или стоејќи пред кујнскиот шкаф во четири попладне. Бидејќи често го правиме тоа по автоматизам, лесно губиме претстава што и колку навистина јадеме.

Тоа е важно затоа што исхраната има голема улога во зачувувањето на здравјето на срцето и крвните садови.

Според Клиниката Кливленд, до 90 отсто од случаите на срцеви заболувања може да се спречат со поздрава исхрана, редовна физичка активност и избегнување на пушењето.

Преработената храна е важен дел од проблемот. Американските центри за контрола и превенција на болести (CDC) наведуваат дека најголемиот дел од натриумот што го внесуваат Американците потекнува од пакуваната храна и оброците во рестораните. Истражувањата ја поврзуваат исхраната богата со натриум со кардиоваскуларни заболувања.

Американските национални институти за здравје (NIH) ја истражуваат и поврзаноста меѓу ултрапреработената храна и срцевите заболувања.

Добрата вест е дека не мора преку ноќ целосно да ја смените исхраната за да постигнете позитивни резултати. Малите, постепени промени обично полесно се усвојуваат и подолго се одржуваат од драстичните. Според еден кардиолог, има една мошне популарна грицка со која вреди да се почне.

Станува збор за чипсот, кој и Македонците често го јадат, особено на дружења или додека гледаат натпревари.

Зошто чипсот е меѓу најлошите избори за срцето?

Д-р Каустуб Дабхадкар, кардиолог во Институтот за срце и крвни садови при „Novant Health“, претходно за списанието „Parade“ изјави дека чипсот е меѓу најлошите избори за здравјето на срцето, заедно со сладоледот и засладените пијалаци. Проблемот, вели тој, е и во нивниот состав и во начинот на кој обично ги консумираме.

„Сите три вида производи се лесно достапни во повеќето домаќинства и во речиси сите ресторани. Освен тоа, често ги консумираме од навика, без воопшто да размислуваме за тоа“, рече д-р Дабхадкар.

Чипсот е калоричен, најчесто се пржи и обично содржи многу сол. Тој е типичен пример за преработена храна што, ако често се консумира, може долгорочно да влијае негативно врз здравјето на срцето.

Д-р Дабхадкар објасни што се случува кога ваквите намирници заземаат голем дел од секојдневната исхрана.

„Исхраната со многу калории, особено кога е богата со заситени и трансмасти и со рафинирани јаглехидрати, го зголемува нивото на штетните масти во организмот и нивото на инсулин. Комбинацијата на овие фактори го поттикнува таложењето на холестеролот во артериите, што доведува до нивно стврднување и создавање наслаги на нивните ѕидови“, објасни д-р Дабхадкар.

Што да јадете наместо чипс за поздраво срце?

Д-р Дабхадкар препорачува постепено и промислено да ги менувате навиките во исхраната, без целосно да се откажете од грицките. Според него, таквиот пристап е поефикасен од обидот одеднаш да ги смените исхраната и начинот на живот.

Едноставен почеток е секоја недела да заменувате по една намирница со мала хранлива вредност со друга што придонесува за здравјето на срцето. Ако, на пример, обично посегнувате по чипс, обидете се да го замените со една рака јаткасти плодови. И понатаму ќе уживате во крцкавата текстура, а ќе внесете значително повеќе хранливи материи.

Д-р Дабхадкар советува да им давате предност на намирниците што се богати со растителни влакна и незаситени масти, а имаат низок гликемиски индекс.

Важен е и начинот на кој јадете. Д-р Дабхадкар советува да обрнувате внимание на храната додека јадете, наместо да грицкате пред телевизор или компјутер. Кога ќе се сосредоточите на храната, повеќе ќе уживате во вкусот и помала е веројатноста да изедете повеќе отколку што ви е потребно.

Покрај изборот на грицки, кардиологот истакнува дека за здравјето на срцето се важни и доволниот сон, справувањето со стресот, редовната физичка активност и одржувањето на социјалните контакти. Истражувањата покажале дека и осаменоста и социјалната изолација се фактори на ризик за развој на срцеви заболувања.