Каја Калас, висок претставник на ЕУ, изјави дека Русија се противи на нејзиното учество како претставник на ЕУ во мировните преговори за Украина поради нејзините цврсти ставови, додека Европската Унија бара решенија за завршување на конфликтот.
Високата претставничка на Европската Унија за надворешна политика, Каја Калас, изрази подготвеност да ја преземе улогата на претставник на ЕУ во преговорите за завршување на војната во Украина, но призна дека Русија се противи на нејзиното учество поради нејзините цврсти ставови, пренесува „Еуроњуз“.
„Русите не ме сакаат на преговарачката маса. Но, имаме ли ние право да одлучуваме кој ќе ја претставува Русија? Немаме“, изјави Калас на неформалниот самит на лидерите на ЕУ во Даблин.
Таа потсети дека европските лидери ја избрале за шефица на дипломатијата во 2024 година, знаејќи дека во текот на нејзиниот мандат би можело да дојде до преговори со Москва.
Калас смета дека ЕУ треба да ја претставува личност со јасно дефинирана институционална улога, наместо да го следи американскиот модел со специјални пратеници.
Сепак, според дипломатски извори, претседателот на Европскиот совет, Антонио Кошта, се издвојува како фаворит за оваа функција.
Калас оцени дека Москва би се противела на секој силен преговарач бидејќи сака да ги наметне своите максимални барања.
„Кога преговарате со некого, сакате другата страна да биде што послаба за да го добиете она што го сакате. Но, не е на Русија да одлучува кој ќе ја претставува Европа“, нагласи таа.
Прашањето за именување европски претставник се отвори откако Украина и САД побараа ЕУ да назначи лице кое ќе учествува во мировните преговори. Засега не е утврдено каква точно би била неговата улога.
