Во првите девет месеци од оваа година, САД управувале со повеќе од 12 милијарди долари приходи од продажба на венецуелска нафта, според извештајот на ревизорската фирма KPMG објавен вчера од американскиот Стејт департмент, пренесува Ројтерс.

Таквиот систем за управување со приходите е воспоставен откако администрацијата на претседателот Доналд Трамп го уапси тогашниот венецуелски претседател Николас Мадуро во јануари.

Купувачите на венецуелска нафта и други природни ресурси уплаќале пари на сметката на американското Министерство за финансии. Потоа средствата биле канализирани до привремената влада на Венецуела, предводена од поранешни сојузници на Мадуро кои сега тесно соработуваат со Вашингтон.

САД одлучуваат за користењето на венецуелските пари

Извештајот е датиран на 29 октомври и е доставен до американскиот Конгрес на почетокот на ноември, изјави претставникот на Стејт департментот. Деталите од извештајот првпат ги објави „Њујорк тајмс“ во вторник. „Извештајот покажува дека системот функционира“, рече претставникот, кој зборуваше под услов да остане анонимен.

Тој додаде дека во текот на првите девет месеци, приходите од венецуелската нафта и други природни ресурси биле искористени за финансирање на основните јавни услуги, одржување на макроекономската стабилност и обнова на важни сектори како што се енергетиката, здравството и инфраструктурата.

Според извештајот, најголемиот дел од средствата — повеќе од 12,1 милијарда долари — се остварени преку продажба на нафта, други нафтени деривати и природен гас. Помали износи се добиени од продажбата на злато, што донесе 108 милиони долари; минерали, кои генерираа 22 милиони долари; и ѓубрива, од чија продажба се собраа 24,6 милиони долари.