Демократскиот кандидат Скот Колом синоќа ја победи републиканската сенаторка Синди Хајд-Смит на изборите за Сенатот на САД во Мисисипи, станувајќи првиот демократ што освоил сенаторско место во оваа јужна држава по 1982 година.

Со оваа победа во Мисисипи, демократите обезбедија предност од 55 спрема 44 во Сенатот, кој брои 100 места, додека исходот од една сенаторска трка на изборите од минатата недела на Алјаска сè уште е непознат. Во Претставничкиот дом, демократите досега освоија 41 место и имаат предност од 254 спрема 168, при што сè уште се чекаат резултатите за 13 места.

Трамп се соочува со сериозен проблем

Со губењето на контролата врз двата дома на Конгресот, претседателот Доналд Трамп, за првпат во текот на неговите два мандати, се соочува со Конгрес што е под контрола на демократите. Ова ѝ овозможува на опозицијата да ги блокира законодавните предлози на неговата администрација и да покрене истраги за нејзиното работење.

Колом, кој е окружен обвинител, за време на својата кампања се фокусираше на директна комуникација со гласачите. Во интервју во октомври, тој изјави дека гласачите во Мисисипи се чувствуваат изневерени од политиките на Трамп – наведувајќи, меѓу другото, војна во Иран која придонесе за пораст на цените на горивата.

Неговата кампања доби поддршка и од демократските сенатори Рафаел Ворнок од Џорџија и Кори Букер од Њу Џерси, кои во октомври учествуваа на предизборни собири.