Австриски шумарски експерти го посетија Националниот парк „Пелистер“, а во центарот на нивниот интерес се семињата и генетскиот материјал на моликата. По посетата на повеќе локации во шумата, договорена е идна соработка со Универзитетот за природни ресурси и применети науки во Виена.

Според информацијата од паркот, пренесена од „Скопје инфо“ на 11 ноември, делегацијата ја предводел Кристијан Бравенц, аташе на австриското Сојузно министерство за земјоделство, шумарство, климатска и еколошка заштита.

Семиња за истражување и обновување на шумите

Најавената соработка опфаќа организирано собирање и проучување на семенски материјал. Целта е зачувување на генетскиот фонд и поддршка за обновувањето на шумите, со посебно внимание на однесувањето на видот во променети климатски услови.

Интерес и надвор од Македонија

Од паркот посочуваат дека се разгледува потенцијалот на моликата и за шумите во Средна и Западна Европа. Нејзините генетски својства и животен циклус се причина за интересот како можен придонес во приспособувањето на шумите кон климатските промени.