Илјадници луѓе се собраа денеска во центарот на Варшава за годишниот Марш на независноста, додека полицијата распореди дополнителни сили. Како што пренесува Ројтерс, на приодите кон местото на собирот се поставени бетонски бариери, а полицајците го проверувале околниот простор.

Во обезбедувањето се вклучени и службеници од други делови на Полска. Полицијата не го објавила нивниот број.

Архивска фотографија од маршот во Варшава на 11 ноември 2024 година. Фото: MOs810 / Wikimedia Commons, CC BY 4.0

Туск повика на смиреност

Собирот се одржува во атмосфера на политички тензии по пукањето во Краков. Премиерот Доналд Туск повика на воздржаност и порача дека независноста, слободата и безбедноста се заедничко добро, без оглед на политичките разлики.

Маршот со години предизвикува спорови меѓу десницата и центристите. Критичарите го обвинуваат за расизам и антисемитизам, додека учесниците велат дека изразуваат национална гордост. Организаторите апелираа настанот да не се користи за политички цели.

Забрана за оружје и пиротехника

Полското Министерство за внатрешни работи уште на 5 ноември ги објави подготовките за обезбедување на празничните настани. Министерот Марчин Кјервињски наложил координација на службите и распоредување сили за мирен тек на собирите.

За 11 ноември во Варшава е воведена забрана за носење оружје, вклучително и негово пренесување во испразнета состојба. Мазовјецките регионални власти вовеле и забрана за носење, пренесување и употреба на пиротехнички средства.

Властите ги повикаа учесниците да ги почитуваат законот и полициските наредби. На службите им е наложено и следење на информацискиот простор поради можни дезинформации.

Отворање во 14:00, тргнување во 14:30

Според официјалната програма на организаторите, отворањето на собирот и пеењето на химната се предвидени за 14:00 кај кружниот тек „Дмовски“, а тргнувањето на маршот за 14:30. Истиот час важи и по скопско време. Програмата потоа продолжува кај Националниот стадион.