Мисијата ќе трае до 13 ноември. Во фокусот се блок-тарифите, цената на струјата и поддршката за ранливите домаќинства.
Министерството за енергетика и Европската комисија на 10 ноември почнаа четиридневна експертска мисија за заштита на домаќинствата што тешко ги покриваат трошоците за енергија. До 13 ноември ќе се разгледуваат домашните блок-тарифи и начините на кои други европски земји им помагаат на ранливите потрошувачи.
Илустративна фотографија од броило за електрична енергија. Фото: Editor abcdef / Wikimedia Commons
Во фокусот е обврската од Реформската агенда 2024–2027 за постепено приспособување на цената на струјата кон пазарното ниво, паралелно со мерки против енергетската сиромаштија. Програмата на мисијата предвидува анализа на малопродажните цени и постојните блок-тарифи, како и споредба со европските модели за заштита на домаќинствата и малите потрошувачи.
Земјава веќе има методологија за мерење на енергетската сиромаштија и годишни програми за заштита на ранливите потрошувачи. На средбите ќе се разгледуваат и краткорочната социјална поддршка, мерките за енергетска ефикасност и искуствата на Грција и Бугарија со следењето на овој проблем.
Во мисијата, организирана преку европскиот инструмент TAIEX, учествуваат Регулаторната комисија за енергетика, „Хабитат Македонија“ и експерти од Грција и Бугарија. Претставници на надлежните министерства и на Државниот завод за статистика ќе го презентираат досегашното спроведување на реформските обврски.
Документи на Министерството за енергетика · МКД.мк · Бизнис вести
