Според податоците на регионалните власти што ги објави „Киев индепендент“, меѓу повредените е и едногодишно дете од Харковската област.
Во руските напади врз Украина во изминатото деноноќие загинаа најмалку девет луѓе, а 39 се повредени, објави „Киев индепендент“, повикувајќи се на регионалните власти. Меѓу повредените има и едногодишно дете.
Во Харковската област се повредени осум лица, меѓу кои и три деца на возраст од една, пет и 11 години, соопшти регионалната управа. Властите во Доњецката и Одеската област пријавија по тројца загинати. Загинати има и во Херсонската, Киевската и Сумската област.
Харков по руски удар на 11 јули 2022 година. Каверот и фотографијата во текстот се архивски | Фото: Служба за вонредни ситуации на Харковската област (kh.dsns.gov.ua) / Wikimedia Commons · Кавер · CC BY 4.0
Одделно од билансот на жртвите, операторот „Укренерго“ соопшти дека во текот на ноќта и утрото била погодена енергетска инфраструктура во осум области. Прекини во снабдувањето со електрична енергија биле регистрирани во шест, пренесе Ројтерс.
Во утринскиот преглед на ТСН се прикажани последиците од нападите, меѓу кои и штетите во Харков.
Во Сумската област бил погоден и приградски воз. Украинската железница соопшти дека во тој напад нема пријавени жртви.
Билансот беше објавен на денот кога во Абу Даби почнаа тристраните преговори меѓу Украина, Русија и САД, на кои се разговара за прекин на борбите и за безбедносни гаранции.
