Македонската футсал репрезентација денеска од 17:30 часот по скопско време ќе ѝ гостува на Финска во арената „Енергија“ во Вантаа. За избраниците на Газмед Хисејини ова е прв натпревар во главната рунда од европските квалификации за Светското првенство во 2028 година.

Финска веќе одигра еден натпревар во групата 4. На 20 октомври загуби со 3:1 на гости кај Шпанија, па вечерашната средба е шанса за двете репрезентации да ги освојат првите бодови.

Финската футсал репрезентација (архива) | Фото: Фудбалска федерација на Финска

Што носи пласманот во групата

Секоја селекција игра по двапати со двата противника. Победниците на 12-те групи и четирите најдобри второпласирани одат директно во елитната рунда. Другите осум второпласирани играат бараж за уште четири места.

Првиот домашен натпревар на Македонија е против Шпанија на 8 декември од 19:00 часот. Реваншот со Финска е предвиден за 27 февруари, четири дена по гостувањето во Шпанија.