Француската политичарка од крајната десница, Марин Ле Пен, и нејзиниот ривал од крајната левица, Жан-Лик Меланшон, ги зацврстија своите водечки позиции во анкетите за преференциите на гласачите пред претседателските избори следната година, покажува најновото истражување, во време кога политичката поларизација во земјата се продлабочува.

Според анкетата на агенцијата Toluna Harris Interactive, спроведена меѓу 3 и 5 ноември, Ле Пен би освоила меѓу 34 и 36 отсто од гласовите во првиот круг од изборите.

Слична анкета спроведена минатиот месец покажа поддршка за неа од 35 до 37 отсто. Меланшон, кандидатот на крајно левичарската партија „Непокорена Франција“ (LFI), би стигнал до вториот круг во сите пет тестирани сценарија, со поддршка од 18 до 19 отсто. Сите други кандидати имаат поддршка помала од 10 отсто.

Ле Пен убедливо води во анкетите

Според анкетата, Ле Пен би победила убедливо во вториот круг, освојувајќи приближно 68 отсто од гласовите, наспроти 32 отсто за Меланшон.

Вториот и последен петгодишен претседателски мандат на Емануел Макрон се ближи кон крајот; овој непопуларен претседател зад себе остава ослабен политички центар и економија во лоша состојба, наведува Ројтерс, што создава простор за партии со порадикални политички ставови.

Меланшон се кандидирал за претседател три пати – во 2012, 2017 и 2022 година – но никогаш не успеал да стигне до вториот круг. Ле Пен, исто така, учествуваше на сите три избори, а во вториот круг во 2017 и 2022 година загуби од Макрон.