Меланија Трамп организираше ретка средба во Белата куќа со руски и украински претставници по шестдневното привремено примирје во Украина, посредувајќи во хуманитарниот прекин на огнот и повикувајќи на подлабока соработка помеѓу двете страни.
Руски и украински претставници се појавија заедно во Белата куќа, на покана на првата дама Меланија Трамп, по привременото примирје во Украина, кое таа помогна да се постигне.
Ова необично собирање се одржа по шестдневното примирје во градот Олешки, окупиран од Русија, и неговата околина во регионот Херсон во Украина.
Прекинот на огнот, кој траеше од 27 октомври до 1 ноември, им овозможи на жителите да се евакуираат на територија под украинска или руска контрола или да останат во Олешки, со обновени храна и медицински материјали.
Мланија Трамп изјави дека повеќе од 750 луѓе биле евакуирани за време на хуманитарната операција. Украинските власти не го објавија својот број на евакуирани лица.
Прекинот на огнот беше ограничен на Олешки и хуманитарната операција во неговата близина, додека борбите продолжија во други делови од Украина, вклучувајќи ги и нападите со руски и украински беспилотни летала.
Меланија Трамп им рече на насобраните дека посредувала меѓу двете земји во организирањето на хуманитарен прекин на огнот.
Шестдневното примирје беше најзначајното примирје откако рускиот претседател Владимир Путин започна целосна инвазија на Украина на 24 февруари 2022 година.
„Ја избравме човечноста пред војната. Мораме да ја искористиме храброста што ја покажавме во Олешки за да најдеме заеднички јазик преку заедничка грижа за страдањето на невините луѓе“, рече Меланија Трамп.
Украина ја претставуваше Давид Арахамија, кој ја предводи пратеничката група „Слуги на народот“ на украинскиот претседател Володимир Зеленски во украинскиот парламент.
Украинскиот омбудсман за човекови права Дмитро Лубинец беше дел од делегацијата.
Средбата се одржа неколку дена откако Зеленски ѝ го додели на Меланија Трамп Орденот на принцезата Олга од прв степен, највисокото ниво на ова признание во Украина, наведувајќи ја нејзината хуманитарна поддршка за таа земја како причина.
Русија ја претставуваа Кирил Дмитриев, специјален пратеник на Путин, и Јана Лантратова, рускиот комесар за човекови права.
Дмитријев ѝ се заблагодари на првата дама за нејзината „исклучителна хуманитарна улога“ во постигнувањето на прекинот на огнот и рече дека Путин лично издал инструкции во рамките на операцијата и ѝ се заблагодарил на Меланија Трамп.
Претседателот Доналд Трамп не присуствуваше на настанот.
Појавувањето понуди ретка слика на високи претставници на Украина и Русија заедно во Белата куќа, додека војната се приближува кон својата петта годишнина.
Меланија Трамп ги повика двете земји да го надградат договорот за Олешки и да се стремат кон постигнување нешто потрајно од шестдневно примирје. Таа рече дека им напишала писма на Путин и Зеленски и побарала од претставниците на нивните влади да ги достават. Таа не ја откри нивната содржина.
Средбата се одржа неколку дена пред официјалните лица од Соединетите Американски Држави, Украина и Русија да одржат трилатерални разговори на 10 и 11 ноември во Абу Даби, главниот град на Обединетите Арапски Емирати.
Фото: ЕПА
