Одлуката беше донесена на третиот ден од советувањето. Поротата се повлече на советување во вторник, 3 ноември, по повеќе од три недели изведување докази пред Кралскиот суд во Саутворк.

Засега не е објавено по кои точки од обвинението Бренд е осуден, а по кои евентуално е ослободен.

На Бренд (51) му се судеше по седум точки од обвинението: три за силување, три за сексуален напад и една за обид за недоличен напад. Обвиненијата се однесуваат на шест жени и на настани од периодот меѓу 1999 и 2009 година.

Според пишувањето на ITV, судијата Џоел Бенатан им рекол на поротниците дека може да прифати само едногласна пресуда.

Одбраната тврдеше дека односите биле со обострана согласност

За време на судењето, судијата го ослободил Бренд од првичното обвинение за недоличен напад и го заменил со обвинение за обид за извршување на тоа дело, наведува „Variety“.

Ова обвинение се однесувало на настан од 2001 година во MTV, кога, според тврдењето на една жена, Бренд се обидел да ја одвлече во машкиот тоалет.

Сведочејќи во своја одбрана, Бренд, како што пренесува AP, признал дека во помладите години бил опседнат со секс, но ја негирал вината и изјавил дека обвиненијата имале разорно влијание врз неговиот живот.

Неговиот адвокат Ијан Винтер во завршниот збор тврдеше дека документарниот филм од 2023 година, во кој за првпат беа изнесени обвиненијата, ги „контаминирал“ исказите на жените.

Обвинителката Риел Карми-Џонс ја отфрли таа теза и истакна дека жените се независни една од друга, пишува „Rolling Stone“.

Што му се заканува?

Датумот на изрекување на казната сè уште не е познат. Според насоките на британскиот Совет за изрекување казни, кои ги пренесува „People“, за силување е предвидена затворска казна од 4 до 19 години, а најстрогата казна е доживотен затвор.

Метрополитенската полиција започнала истрага во септември 2023 година, откако обвиненијата против Бренд ги објавија „The Times“ и емисијата „Dispatches“ на телевизискиот канал 4. Тој беше обвинет во април 2025 година.