„Мичиген, успеавме!“ – им рече Ел-Сајед на своите собрани поддржувачи. Тој изјави дека е „неверојатно горд и почестен“ што ќе стане нивниот нов сенатор. Доколку неговата победа биде потврдена, Ел-Сајед ќе стане првиот муслиман избран во Сенатот на САД.

„Му дадовте шанса на кандидатот од кого најмалку се очекуваше да победи, и за тоа ви благодарам. Сè ова е благодарение на вас“, рече тој. Тој изрази благодарност до гласачите кои го пречекаа во своите цркви, синагоги и домови во текот на кампањата.

„Знаеме дека Америка е доволно голема за сите нас“

„Ви благодарам за вашата доверба, вашата вера и вашата љубезност. Сето ова ќе го носам со себе и се надевам дека ќе ви возвратам со лидерство кое повеќе од доволно ќе ја оправда довербата што ми ја укажавте“, изјави тој. Ел-Сајед истакна дека неговите политички противници, во текот на кампањата, го напаѓале не само него, туку и неговите гласачи.

„Тие сакаат Америка во која нема место за некои од нас. Ние знаеме дека Америка е доволно голема за сите нас“, рече тој.

Изборната трка во Мичиген беше одбележана со остри судири и лични напади. Жестоките критики на Ел-Сајед упатени кон израелската влада наидоа на силно противење од страна на републиканците, како и од некои умерени демократи, како за време на партиските прелиминарни избори, така и за време на финалната кампања за општите избори.

„Мајк, уживај во пензијата“

Претседателот Доналд Трамп, исто така, често го напаѓаше Ел-Сајед, нарекувајќи го „Мухамед“ и изјавувајќи дека тој треба да биде принуден да помине низ детектор за метал.

За време на својот победнички говор, Ел-Сајед се осврна на овие напади и не ги поштеди своите политички противници. „Мајк, уживај во пензијата!“ – рече тој, обраќајќи му се на Роџерс.

„Вие избравте омраза, а Мичиген избра надеж. Се надевам дека никогаш повеќе нема да мораме да гледаме луѓе како вас во нашата држава“, забележа тој.

Порака за Венс и Трамп

Потоа, тој го насочи вниманието кон потпретседателот на САД, Џеј Ди Венс. „Џеј-Ди, ‘хабиби’, постои прекрасна иронија во фактот што ти – според Уставот – ќе бидеш оној што ќе ја води мојата заклетвата во јануари“, рече Ел-Сајед, користејќи го арапскиот израз „хабиби“, што значи „драг мој“.

Ел-Сајед имаше порака и за претседателот Трамп. „Доналд, слушај – знам дека имаше потешкотии со моето име. Па така, штом Џеј-Ди ќе ја прими заклетвата во јануари, едноставно можеш да ме нарекуваш ’сенатор‘“, изјави тој.

На крајот, им се обрати на моќните политички донатори и групите со посебни интереси кои ја финансираа кампањата против него.

„До политичките комитети и групите со посебни интереси кои се обидоа да нè поразат, велам вака: доаѓаме да го промениме вашиот политички систем“, изјави тој.

Притоа, конкретно ја спомена AIPAC, влијателна американска про-израелска лоби-организација која, според него, потрошила 42 милиони долари на кампања против него. „До AIPAC, кои потрошија 42 милиони долари против нас: ви благодарам што ми дадовте шанса да ве победам двапати“, заклучи Ел-Сајед.