Фудбалските клубови Интер и Милан официјално го открија архитектонскиот проект за новиот заеднички објект, кој ќе го замени легендарниот Сан Сиро и ќе стане нов дом на градските ривали од сезоната 2031/2032.
Новото модерно здание го носи името „Генерали стадион“, благодарение на договорот за спонзорски права, додека вкупната вредност на оваа монументална инвестиција е проценета на дури 1,2 милијарди евра. Проектот пред јавноста го претставија реномираниот архитект Норман Фостер и водечкиот стручњак за спортски објекти Дејвид Маника.
Предвидено е новиот стадион да има капацитет од 71.500 седишта. Иако тоа е нешто помалку во споредба со сегашните 75.000 гледачи што ги собира Сан Сиро, архитектонските решенија се осмислени така што на навивачите ќе им овозможат значително поинтимно и поинтензивно доживување на натпреварите. Трибините ќе бидат максимално доближени до самиот терен, а особено се издвојува стрмниот наклон од 37 степени на секторите зад головите, со што ќе се создаде дополнителен притисок врз противниците и ќе се засили чувството на блискост со актерите на теренот.
„Најважното нешто што го сфативме при проектирањето е дека Сан Сиро е чувство. Тој е многу повеќе од градба. Сè што правевме беше насочено кон тоа да го пренесеме тоа чувство на новиот стадион“, порача Маника.
Исклучително важен сегмент на новиот објект ќе биде и звучната изолација. Посебно проектираната покривна конструкција ќе ги покрива сите трибини, додека теренот ќе остане отворен. Целокупниот дизајн е осмислен со цел да го засили екот од трибините и целосно да го задржи препознатливиот акустичен идентитет на миланскиот храм на фудбалот.
„Сакам навивачите да дојдат на новиот стадион и повторно да ја почувствуваат истата возбуда, да почувствуваат како градбата живее и дише заедно со нив, токму како што е случај денес“, додаде Маника.
Новиот објект е проектиран како повеќенаменска арена што нема да служи исклучиво за фудбалски натпревари. Стадионот ќе ја има целата неопходна инфраструктура за организирање натпревари во американски фудбал, рагби-дуели, како и големи музички спектакли и концерти.
Ривалите од Милано за купувањето на култниот Сан Сиро и придружното земјиште во околината веќе издвоиле 197 милиони евра. Почетокот на работите за изградба на новиот комплекс е закажан за 2028 година.
