Сите осум нови епизоди пристигнаа на „Нетфликс“ на 23 октомври, три години по третата сезона. Според „ФликсПатрол“, веб-страница која ги следи листите на најгледани содржини на „Нетфликс“, „Лупен“ на 24 октомври била најгледаната серија во светот, пред „Nobody Wants This“ и „Below“.

Критичарите задоволни, гледачите разочарани

На платформата „Ротен томејтос“, четвртата сезона засега има 100 отсто позитивни критики, но врз основа на само пет рецензии. Според „Скрин рент“ првите три сезони на серијата имаат просечна оценка од 98 отсто кај критичарите.

„Колајдер“ на новата сезона ѝ додели оценка 8/10, оценувајќи дека го задржува квалитетот на претходните сезони, а дека акционите сцени се уште подобри. Порталот „Бат вај доу“ ѝ додели оценка 9/10, со заклучок дека вредело да се чека три години.

Сепак, првите рецензии од гледачите на „Ротен томејтос“ се претежно негативни. Гледачите им забележуваат на нереалните сцени и прекумерната употреба на технологија, а некои пишуваат дека на новата сезона ѝ недостига досетливоста што ги красела претходните сезони.

Оценката од публиката сè уште не е објавена, бидејќи гласале помалку од 50 луѓе.

Асан повторно во бегство

Според описот на „Нетфликс“, дејството започнува четири години по настаните од третата сезона. Асан се наоѓа во затвор, а во меѓувреме се ограбуваат музеи во името на Лупен, поради што тој мора да побегне за да ја докаже својата невиност.

Покрај Омар Си, во серијата се враќаат и Лудивин Сање, Антоан Гуи, Суфијан Гераб и Ширин Бутела, а на актерската екипа ѝ се придружуваат и Тео Кристин и Лајка Блан-Франкар.