Луис Инасио Лула да Силва е реизбран за претседател на Бразил со четврти мандат, по тесна победа над сенаторот Флавио Болсонаро во вториот круг на изборите, со што станува првиот бразилски лидер со четири мандати и првиот што победил по завршување на второ место во првиот круг.
Бразилскиот претседател Луис Инасио Лула да Силва е реизбран на функцијата, откако во вториот круг од изборите го победи сенаторот Флавио Болсонаро.
Во трка која беше неизвесна до самиот крај, Лула освои 51,76 отсто од гласовите, додека Болсонаро доби 48,24 отсто, според податоците засновани на преброени 99,81 отсто од гласачките ливчиња.
Со оваа историска победа, 80-годишниот левичарски лидер станува првиот бразилски претседател со четири мандати. Вреди да се напомене дека тој е и првиот кандидат во бразилската историја кој победил откако во првиот круг завршил на второто место – сценарио што не се случило уште од враќањето на директните претседателски избори во 1989 година.
Треба да се потсети дека десничарскиот сенатор Болсонаро – син на поранешниот претседател Жаир Болсонаро, кој моментално е во затвор – победи во првиот круг претходно овој месец, со предност од околу 2,2 милиони гласови пред Лула. Победата на Лула претставува сериозен удар за политичкото движење на семејството Болсонаро, бидејќи Флавио не успеа да го постигне она што ниту неговиот татко не успеа: да го победи Лула на избори.
Во текот на целата кампања, Лула нагласуваше дека овие избори се прашање на „суверенитет“, наведувајќи дека народот избира меѓу „некој што го бакнува бразилското знаме и некој што го бакнува американското“.
