Италијанската полиција изврши преку 150 претреси во неколку градови поради насилните протести во Милано. Владата воведе остри мерки за зачувување на јавната безбедност и спречување на малолетничкиот криминал во услови на засилени безбедносни мерки и најавени нови демонстрации.
Италијанската полиција извршила повеќе од 150 претреси во Милано, Монца и уште 20 градови, главно во регионот Ломбардија, во рамки на истрагата за немирите што се случија минатиот викенд, објави агенцијата АНСА.
За денеска низ Италија се најавени десетици демонстрации, во услови на засилени безбедносни мерки по неодамнешните протести и насилните судири во Милано.
Италијанската влада во средата усвои декрет со итни мерки за зачувување на јавната безбедност и сузбивање на малолетничкиот криминал. Мерките предвидуваат можност за превентивно задржување малолетници, построги казни за организирано насилство и распоредување дополнителни 500 војници на улиците во Милано.
Со новите правила се воведува и претпоставка на пресметливост за малолетниците на возраст од 14 години, што значи дека ќе се смета дека се способни да ги разберат последиците од своите постапки и да управуваат со нив, освен ако не се докаже спротивното.
Мерките доаѓаат по серијата демонстрации и насилни инциденти, поради кои италијанските власти најавија заострување на пристапот кон нарушувањето на јавниот ред и безбедност.
