Министерот за здравство Сашо Клековски се вакцинираше против сезонски грип со цел да ги поттикне граѓаните, особено ризичните групи, да се пријават за бесплатна вакцинација преку системот Мој Термин, кој започна на 14 октомври и веќе има над 55.000 пријавени граѓани.
Во Институтот за јавно здравје, кој е еден од пунктовите за имунизација против сезонски грип, утрово меѓу граѓаните кои примија вакцина беше и министерот за здравство, Сашо Клековски.
Најефикасна мерка за превенција
– Вакцинацијата против сезонски грип е најдобра и најефикасна мерка за превенција на ова заболување. Токму затоа денеска со личен пример укажав на важноста од навремената заштита на здравјето, посебно кај ризичните групи население. Вакцинацијата докажано спречува појава на потешки форми, компликации и смртен исход од ова заболување. Охрабрува што за само една недела над 55.000 граѓани се пријавија за вакцинација. Денеска стартуваше вакцинацијата во сите пунктови низ државата, така што апелирам доколку граѓаните од ризичните групи сè уште не се пријавиле за бесплатна вакцинација на сајтот vakcinacija.mk, да го сторат тоа што поскоро, посочи министерот.
Пријавување за бесплатна вакцинација
Од 14 октомври, кога беше отворена формата за пријавување, до денес за бесплатна вакцинација против сезонски грип се пријавија 55.535 граѓани.
Над 60% од пријавените се лица постари од 65 години, а околу една третина се граѓани со хронични заболувања. Пријави се евидентирани на сите 31 пункт за вакцинација низ државата, а најмногу граѓани се пријавиле во Скопје, Битола, Прилеп, Струмица и Тетово. Вакцинацијата започна утрово, а до пладне се вакцинирани 368 граѓани.
Како да се пријавите
Заинтересираните граѓани од ризични групи може да се пријавуваат за бесплатна вакцинација против сезонски грип на следниот линк: https://vakcinacija.mk/mk/registration-flu. Со пополнување на формата на сајтот, граѓаните се регистрираат за вакцинација директно во системот Мој Термин. Потоа, согласно распоредот предвиден во планот за вакцинација, ќе добијат СМС порака со информација за точниот датум и час кога треба да се вакцинираат на пунктот што ќе го изберат при регистрацијата.
Кои групи се опфатени
Бесплатната вакцинација против сезонски грип е наменета за следните ризични групи: лица над 65 години, лица со хронични заболувања, здравствени работници, бремени жени, како и деца на возраст од 6 месеци до 5 години, соопшти министерството.
