Турција им забрани на социјалните мрежи да им нудат услуги на деца помлади од 15 години, според новите прописи објавени во Службениот весник.
Прописите, кои во Турција стапуваат во сила на 1 ноември, ги обврзуваат платформите да воведат проверка на возраста на корисниците, со заштита на личните податоци, и да понудат посебни услуги и алатки за родителски надзор за малолетниците постари од 15 години.
Како што пренесува Анадолија, родителите ќе можат да управуваат со поставките на профилите на своите деца, да го ограничуваат времето на користење и да одобруваат платени трансакции.
Проверката на возраста за постојните профили мора да заврши до 31 март 2027 година, а профилите на корисниците помлади од 15 години ќе бидат затворени.
Прописите се дел од новиот закон за социјални мрежи што турскиот парламент го усвои во април.
