Соединетите Држави и Иран изнесуваат спротивставени тврдења во врска со контролата врз Ормускиот Теснец, витален поморски пат за глобалното снабдување со енергенси.

„Соединетите Држави и регионалните партнери јасно го контролираат теснецот“, објави на платформата за социјални медиуми „Икс“. Централната команда на САД (CENTCOM), која ги надгледува воените операции во регионот. „Претходно денес, еден генерал од иранската Исламска револуционерна гарда во медиумите тврдеше дека ‚Ормускиот Теснец е затворен‘ и дека неговата земја има ‚целосна контрола врз него‘. Ова е НЕТОЧНО“, наведе CENTCOM.

Теснецот како жариште

Ормускиот Теснец стана главно жариште во конфликтот меѓу САД и Иран откако војната започна кон крајот на февруари. Преку закани и напади врз пловни објекти, Иран значително го попречи сообраќајот низ теснецот, кој е клучен за глобалното снабдување со нафта, гас и вештачки ѓубрива.

Американската војска, исто така, напаѓаше ирански цивилни пловни објекти и воведе поморска блокада за бродовите што влегуваат или излегуваат од иранските пристаништа. Прекините во сообраќајот на еден од најважните светски трговски патишта за енергенси предизвикаа пораст на цените на нафтата на глобално ниво.

Испораките на нафта продолжуваат и покрај нападите

„Бродови што превезуваат комерцијална стока и енергетски производи моментално минуваат низ Ормускиот Теснец“, извести CENTCOM.

Пред војната, аналитичарите проценуваа дека низ теснецот дневно минуваат речиси 19 милиони барели нафта. Експертите делумно го припишуваат зголемувањето на испораките на енергенси од крајот на јули на проширувањето на таканаречената флота за транспорт на кратки релации. Станува збор за танкери кои, под заштита на американската морнарица, превезуваат нафта од терминалите за полнење во Персискиот Залив до пловни објекти што чекаат надвор од теснецот. Сепак, напади врз бродови во овој воден пат се забележани и во последните денови.