Снимката за кратко време собра повеќе од 9,4 милиони прегледи, а додека едни го гледаа потегот на Кајли Џенер како уште еден пример за живот во луксуз, други тврдеа дека станува збор за сосема разбирлива желба за приватност.

Кино само за нив три

Кајли веќе извесно време на Јутјуб споделува делови од своето секојдневие, од деловните обврски до моментите со семејството и пријателите. Овојпат покажа како изгледало нејзиното излегување со Викторија Виљароел и Анастасија Караниколау.

Пријателките одлучиле да го гледаат филмот „Verity“, но во салата не ги пречекала публика, туку целосно празно кино, резервирано само за нив. На располагање имале и бројни грицки, а пред почетокот на проекцијата разговарале и се забавувале без други посетители околу нив.

Таквата сцена, очекувано, не помина незабележано.

„Можела само да стави капа“

Дел од снимката набрзо се прошири и на платформата X, каде што еден корисник коментирал дека Кајли, поради огромната популарност, „мора да изнајми цело кино“ во Лос Анџелес. Многумина не се согласиле со ова објаснување.

„Или можела едноставно да стави капа и една вечер да се облече како нормална личност“, напишал еден корисник, а коментарот собра повеќе десетици илјади лајкови.

Следуваа и многу поостри оценки, па поединци нејзиниот начин на живот го нарекоа „тажен“ и „празен“, тврдејќи дека и познатите личности понекогаш мора да го прифатат фактот дека го делат јавниот простор со другите.

„Познатите нормално одат во кино“

Некои корисници отидоа чекор подалеку и наведоа примери на познати луѓе кои, како што тврдат, редовно ги гледаат во обичните кина.

„Можела да оди инкогнито доколку навистина го сакала тоа“, гласел еден од коментарите.

Друг корисник навел дека Кристофер Нолан, Кристен Стјуарт и Џек Блек без поголеми проблеми посетуваат кина и се движат меѓу луѓето, заклучувајќи дека присуството на славна личност во салата не мора нужно да предизвика хаос.

Сепак, дел од публиката потсетил дека ситуацијата на Кајли не е сосема безопасна.

Семејството Кардашијан-Џенер веќе со години многу посериозно му пристапува на прашањето за безбедноста, особено откако Ким Кардашијан беше ограбена во Париз во 2016 година.

И Кајли имала непријатни искуства со демначи и во повеќе наврати барала забрана за приближување. Поради тоа, нејзините обожаватели истакнале дека резервирањето цела сала можеби не е само демонстрација на богатство, туку и начин да го намали ризикот од несакани средби.

Во серијата „The Kardashians“ зборувала и за стравот за сопствената безбедност, па оние што ја бранеле порачале дека не е сосема фер нејзиниот потег да се гледа исклучиво низ призмата на луксузот.