На 1 октомври, Стефан и неговата сопруга Марта станаа родители на малиот Лука, а неколку дена подоцна тој објави видео во кое го документираше целиот период – од моментите пред заминувањето во болница, преку раѓањето на синот, па сè до враќањето дома.

Видеото не е само снимка од пристигнувањето на новиот член на семејството, туку емотивен дневник од деновите во кои животот на Стефан и Марта целосно се променил.

Породувањето ги затекнало во периодот кога го уредувале домот

Марта добила породилни болки во период кога нивниот дом сè уште не бил целосно завршен. Додека таа се подготвувала за заминување во болница, Стефан паралелно се справувал со мајстори и последните подготовки за просторот во кој требало да го донесат бебето.

Наместо сè да биде однапред испланирано, Лука пристигнал во момент кога сè уште се работело на домот, што на целата приказна ѝ дава дополнителна доза спонтаност и реалност.

Од болничката соба, Стефан ги снимал моментите во кои Марта ги минува последните часови пред породувањето. Во еден од кадрите ја прашува дали ја боли, обидувајќи се да ѝ даде поддршка додека се приближува најважниот момент.

А потоа следува сцената која засекогаш ќе остане во нивното семејно сеќавање – раѓањето на Лука и првата средба со нивниот син.

За Стефан, присуството на породувањето било искуство кое дополнително му го променило погледот кон Марта и кон целата приказна за родителството. Тој и претходно зборуваше за нејзината храброст и за тоа колку силно го доживеал целиот процес, а сега со видеото им овозможи на следбениците да видат дел од тие моменти.

Романтична вечера во болница

По раѓањето на Лука, следувале и првите моменти на новопечените родители во болницата. Меѓу најсимпатичните сцени е нивната мала „романтична вечера“, на која наместо шампањско наздравуваат со сок.

Едноставниот момент го одбележал почетокот на новото поглавје – овојпат веќе како родители.

Подарок за Марта и посебно значење

По враќањето дома, Стефан ја изненадил Марта со прстен. Подарокот, како што покажува видеото, има посебно значење бидејќи е поврзан со нејзината желба секое дете да биде одбележано со свој прстен.

Во деновите по раѓањето, на новите родители им била потребна и помош од најблиските. Нивните родители биле тука за подготовките, храната, средувањето и останатите обврски, за Стефан и Марта што повеќе да можат да се посветат на својот син.

Првото утро дома како родители

Еден од најемотивните делови од видеото е утрото по првата ноќ дома со Лука.

Додека бебето спие, Стефан зборува за тоа како поминала првата ноќ и за чувството да се разбуди во својот дом, но овојпат со уште еден член во семејството.

По сите подготовки, болнички часови, возбуда и неизвесност, конечно се дома.

Само што од тој ден ништо повеќе не е исто.

Марта и Стефан веќе не се само партнери – тие се родители на Лука и започнуваат едно сосема ново поглавје, исполнето со непроспиени ноќи, нови обврски, но и со моменти кои, како што покажува нивното видео, засекогаш ќе им останат меѓу најубавите семејни спомени.