[ВИДЕО] Познатиот возач на Формула 1 одбил приватен авион: Од Малезија до трката во Сингапур ќе патува со велосипед, ќе помине 350 километри

Додека повеќето возачи на трките патуваат со приватни авиони, искусниот Финец одлучил да седне на велосипед и низ Азија да помине околу 350 километри.

Ботас ја започна својата велосипедска авантура по завршувањето на Големата награда на Малезија, а патувањето редовно го документира на социјалните мрежи.

„Одам по помалку утврдениот пат (а можеби и малку подолг)“, напиша Ботас покрај една од објавите.

Во друга објава на Х сподели снимка на која ноќе вози велосипед.

„Да, возам до Сингапур“, порача Ботас.

Финецот не е сам на патувањето. Друштво му прави неговата партнерка Тифани Кромвел, професионална велосипедистка од Австралија. Ботас до четврток мора да стигне во Сингапур, каде што го очекуваат бројни медиумски обврски пред новата трка.

Патувањето уште сега воопшто не е лесно. Ботас вториот ден на велосипед поминал дури 161,91 километар, за што му биле потребни речиси шест часа. Голем дел од патот минува по макадамски и помалку прометни патишта.

Ваквиот начин на патување можеби и не треба премногу да изненадува кога се знае колку Ботас во последните години му е посветен на велосипедизмот.

Возачот на Формула 1 редовно учествува на трки на макадам, а заедно со Кромвел често завршува различни велосипедски предизвици. Летово го освои и петтото место во квалификациите за оф-роуд натпреварување во Чешка, со што обезбеди пласман на Светското првенство во гравел.

Сепак, на тоа натпреварување нема да може да настапи бидејќи се одржува токму овој викенд.

Ботас е и еден од луѓето кои стојат зад трката „FNLD GRVL“ во неговата родна Финска, а познато е дека е голем љубител на гравел велосипедизмот.

На четири тркала, сепак, Финецот оваа сезона нема причина за задоволство.

Ботас, кој во кариерата има десет победи во Формула 1, минува низ една од најтешките сезони. Откако минатата година ја помина како резервен возач на „Mercedes“, оваа сезона настапува за „Cadillac“.

По 16 трки и понатаму е без освоен бод, додека дури осум трки не успеал да ги заврши.

Затоа, патувањето до Сингапур на две тркала можеби ќе му биде и добредојдено бегство од проблемите што ги има оваа сезона на патеката.