Силната бура што во текот на викендот ја погоди источната брегова линија на САД, од Вашингтон до Мејн, предизвика прекини на електричната енергија, поплави и сериозни нарушувања во воздушниот сообраќај.

Повеќе од 400 летови беа откажани, а во еден момент повеќе од 100.000 домаќинства и деловни објекти останаа без електрична енергија.

Според податоците на „PowerOutage.com“, во саботата во 21:37 часот по источноамериканско време, повеќе од 73.000 домаќинства и деловни објекти во Конектикат, Њујорк, Масачусетс, Њу Џерси, Род Ајленд и Пенсилванија сè уште биле без струја.

Њујорк и Конектикат поединечно имале повеќе од 20.000 објекти без електрична енергија. Претходно во текот на денот, во четири сојузни држави – Конектикат, Њујорк, Пенсилванија и Њу Џерси – биле регистрирани вкупно повеќе од 100.000 прекини на електричната енергија.

Поплави и евакуации во Њу Џерси

Во делови од Њу Џерси се пријавени поплави, од округот Берген на северот до Кејп Меј на јужниот дел од државата. Во некои крајбрежни места биле спроведени и доброволни евакуации.

Стадионот „МетЛајф“ во Ист Радерфорд соопшти дека концертот на рок-групата „Еј-Си/Ди-Си“, првично планиран за петок, е одложен за 2 октомври поради временските услови.

Стотици откажани летови

Според податоците на „FlightAware“, до 21:50 часот во саботата по источноамериканско време биле откажани 445 летови поврзани со американските аеродроми, додека 3.016 летови доцнеле.

Метеоролозите предупредуваат на нови поплави и силен ветер

Американската Национална метеоролошка служба предупреди дека бурата ќе продолжи да носи крајбрежни поплави, опасни морски струи, силни налети на ветер и обилни врнежи во средноатлантскиот регион и Нова Англија најмалку до понеделник.

Гувернерите на Њујорк и Њу Џерси во петокот прогласија вонредна состојба во окрузите за кои се очекува да бидат најтешко погодени, вклучително и Њујорк. Гувернерот на Конектикат го активираше државниот центар за управување со вонредни ситуации.