Корина Шумахер во новиот документарен филм на Нетфликс, „The Birth of a Legend“ (Раѓањето на една легенда), навела дека и денес се расплакува кога во автомобил ќе ја слушне песната „Rush Rush“ од Пола Абдул.
Таа се присетила дека тоа отсекогаш била нивната заедничка песна.
Филмот трае 105 минути и се занимава со сезоната 1994 година, во која Михаел Шумахер ја освоил својата прва титула светски шампион во Формула 1.
Воедно, сеќавањето на нивната заедничка песна е само една од приватните приказни што Корина ги споделува во документарецот. Таа зборувала за почетоците на нивната врска и објаснила дека нејзината мајка на почетокот не била воодушевена од Михаел.
„Секогаш се расплакувам кога ќе ја слушнам нашата песна. Мајка ми беше целосно против нашата врска. Михаел постојано беше на картинг-патеката и секогаш ги истиснуваше другите од патеката“, раскажала таа.
И покрај противењето на нејзината мајка, Корина и Михаел ја започнале својата врска.
„Прекрасно е кога си со некого на кого му се радуваш секој ден. Моето срце беше со него и кога победуваше и кога губеше. Секогаш бев покрај него“, истакнала Корина.
Покрај личните сеќавања, документарецот се фокусира и на првата шампионска сезона на Михаел. 1994 година требаше да биде одбележана со големата пресметка меѓу Шумахер и тогашниот шампион Аиртон Сена. По трагичните несреќи на Роланд Ратценбергер и Сена, Корина сфатила колку е опасен мотоспортот.
„Тогаш за првпат сфативме колку е всушност опасен тој спорт“, се присетила таа.
Неговиот тогашен менаџер Вили Вебер открил дека Шумахер по несреќата на Сена дури размислувал да ја прекине кариерата. Вебер тврди дека Шумахер плачел во автобусот и му рекол дека не е сигурен дали воопшто сака да вози на следната трка.
Меѓутоа Корина рекла дека не знаела за неговите дилеми. „Не ми кажа дека повеќе не може. Мислам дека сакаше да ме заштити“, објаснила таа.
На крајот од сезоната, во Аделаида, Михаел Шумахер за првпат стана светски шампион. Во текот на кариерата освои вкупно седум титули светски шампион во Формула 1.
Документарецот „Schumacher ’94 – The Birth of a Legend“ (Шумахер ’94 – Раѓањето на една легенда) ќе има светска премиера на Нетфликс на 2 октомври.
