Поранешниот унгарски премиер Виктор Орбан ѝ честиташе на Алтернатива за Германија (АфД) за големата победа на покраинските избори во Саксонија-Анхалт, нагласувајќи дека ова е само почеток и оценувајќи ја победата како значајна за Германија и Европа.
Поранешниот унгарски премиер Виктор Орбан денеска ѝ честиташе на Алтернатива за Германија (АфД) за победата на покраинските избори во Саксонија-Анхалт, оценувајќи дека станува збор за „голема ноќ за Германија и Европа“.
„Голема ноќ за Германија и Европа! Им честитам на копретседателката на АфД, Алис Вајдел, на водечкиот кандидат на АфД, Улрих Зигмунд, и на целата АфД за убедливата победа во Саксонија-Анхалт“, напиша Орбан во објава на социјалната мрежа Икс.
„Подгответе се. Ова е само почеток!“, истакна Орбан.
Алтернатива за Германија (АфД), предводена од Улрих Зигмунд, вчера убедливо победи на покраинските избори во германската сојузна покраина Саксонија-Анхалт со 43,8 отсто од гласовите, но не освои апсолутно мнозинство.
Христијанско-демократската унија (ЦДУ) доживеа тежок пораз и со само 17,2 отсто од гласовите заврши на второто место, покажуваат прелиминарните резултати што изборната комисија ги објави во текот на ноќта.
Според прелиминарните резултати, АфД на изборите во неделата освои 43,8 отсто од гласовите – повеќе од двојно во однос на 20,8 отсто освоени на изборите во 2021 година. ЦДУ сега освои 17,2 отсто од гласовите, додека на претходните избори имаше 37,1 отсто. За Социјалдемократската партија на Германија (СПД) гласале 9,3 отсто од избирачите, во споредба со 8,4 отсто на претходните избори, пренесува „Билд“.
АфД, според прелиминарните резултати, повеќе од двојно го зголеми својот удел во гласовите, од 20,8 отсто во 2021 година на 43,8 отсто, што е најдобар резултат што некоја партија го постигнала на покраински избори во Германија во последните десет години.
Денес
