Американската актерка Кристен Џонстон откри дека не била трезна за време на снимањето на познатата сцена од култната американска серија „Сексот и градот“.
Имено, нејзиниот лик Лекси Федерстон, за време на приватна забава, паѓа низ прозорецот на една њујоршка зграда, а актерката откри дека во тоа време била на врвот на своите проблеми со зависноста.
Џонстон гостувала во шестата сезона на серијата „Сексот и градот“ како Лекси Федерстон, некогашна кралица на ноќниот живот, која, откако на една луксузна забава не ѝ дозволуваат да пуши, ја изговара познатата реченица: „Њујорк е готов!“.
Потоа Лекси вели: „Толку ми е здодевно што би можела да умрам“, а потоа паѓа низ отворениот прозорец од 18-тиот кат.
„Луѓето и понатаму ми приоѓаат. Тоа е првото нешто што ми го кажуваат. Веројатно тоа ќе ми пишува и на надгробната плоча“, изјавила актерката.
Актерката за американските медиуми рекла дека во периодот кога се снимала таа епизода била во многу лоша состојба поради проблемите со зависноста.
„Бев во целосен хаос“, изјавила Џонстон, која во текот на последните две децении во одредени периоди успевала да остане трезна, пренесе „Entertainment Weekly“.
Иако, како што навела, во таа конкретна ситуација не била на нивото на својот лик Лекси, Џонстон признала дека како млада актерка често излегувала во Њујорк.
„Бев малку хаотична, доцна навечер, по многу театарски претстави, многу пијачки по претставите, многу вино и повремено експериментирање со кокаин, но не како Лекси“, изјавила таа.
Џонстон објаснила дека нејзините проблеми потекнуваат уште од детството.
„Отсекогаш само сакав да побегнам. Не се чувствував добро во сопствената кожа“, објаснила актерката.
Во своите мемоари, објавени во 2012 година, таа навела дека почнала да пие и да експериментира со наркотици уште во средно училиште. Во периодот кога глумела во серијата „Третиот камен од Сонцето“, како што напишала, земала меѓу 10 и 30 таблети дневно.
Откако, неколку години по гостувањето во „Сексот и градот“, за првпат престанала да консумира алкохол и дрога, слободното време почнала да го исполнува со различни хобија.
