Додека земјата околу неа се тресела, уривајќи куќи, згради и мостови во источна Индонезија, Марија Флорида Ного Келен ја раѓала својата ќерка.
Оваа 39-годишна жена итно била подложена на царски рез во моментот кога земјотрес со јачина од 7,7 степени и серија последователни потреси ја пустошеле провинцијата Источна Нуса Тенгара, што претставува најтешка катастрофа што ја погодила земјата од 2022 година.
И покрај тресењето на земјата и влошувањето на нејзината здравствена состојба, таа успеала да го донесе на свет своето четврто дете.
„Не се плашев за време на операцијата“, рекла Марија, која живее во областа Нагекео, во близина на епицентарот на земјотресот. „Морав да останам здрава поради моите деца“, додала таа.
Породувањето се случило два месеци пред предвидениот термин поради комплицирана бременост која претставувала ризик и за Марија и за бебето. Лекарите морале да ја извршат операцијата користејќи батериски светилки за време на повремените прекини на електричната енергија, додека зградата на болницата силно се тресела.
Лекарите изјавиле дека Марија можела да доживее смртоносен епилептичен напад доколку породувањето било одложено.
„Немавме избор“, изјавила Јона Сара Пардеде, гинекологот на Марија.
„Како луѓе, чувствувавме страв… Операцијата беше тешка бидејќи бебето беше многу ситно. Му се молев на Бога: ’Те молам, помогни нѝ. Немаме ниту респиратор‘“, раскажала докторката.
На крајот се родила нејзината ќерка Гемпита, која го добила името според индонезискиот збор за земјотрес (гемпа). Гемпита се родила за време на последователните потреси, со тежина од само 1,3 килограми. Нејзината состојба била стабилна додека престојувала во инкубатор поставен на тревна површина во шатор на отворено, додека сонцето силно го печело Нагекео.
Марија, која по породувањето имала крвавење, изјавила дека е благодарна што преживеала.
„Им бев многу благодарна на лекарите. Дури и кога просторијата почна да се урива, тие не нè напуштија“, истакнала таа.
Фото: Ројтерс
