Потсетуваме, Ел Нињо е природен климатски феномен при кој површинските води на Тихиот Океан, поточно во неговиот централен и источен дел, значително се загреваат.

Ова затоплување ги менува големите обрасци на атмосферската циркулација – ветровите, воздушниот притисок, како и количината и распределбата на врнежите – па може да влијае врз времето и климата и на илјадници километри од Пацификот. Поедноставно кажано, Пацификот силно се загрева, атмосферската циркулација се менува, а потоа се менуваат и временските обрасци ширум светот.

Но, оваа година затоплувањето е особено силно, па претстојниот Ел Нињо веќе се нарекува Супер Ел Нињо.

Како тоа би можело да влијае врз времето во Европа оваа есен и зима, прогнозираше порталот „Severe Weather“.

Супер Ел Нињо е предизвикан од невообичаено силни западни ветрови во екваторијалниот дел на Пацификот и големо количество топлина акумулирана под површината на океанот. Температурните отстапувања во длабочините на морето достигнуваат повеќе од 9°C над просекот, додека отстапувањата на површината во источниот Пацифик надминуваат 5 – 6°C.

Прогнозите во последните месеци континуирано укажуваат дека овогодишниот Ел Нињо би можел да биде многу интензивен. Најновите модели покажуваат дека Ел Нињо би можел да го достигне својот врв околу ноември и декември 2026 година, при што некои прогнози предвидуваат отстапувања од околу +4°C, главно околу екваторот (т.н. ЕНСО подрачје), што би го вброило овогодишниот Ел Нињо меѓу екстремните, односно настаните познати како „Супер Ел Нињо“.

Како Ел Нињо ќе влијае врз времето во Европа?

Атмосферата веќе покажува силна реакција, а Европа би можела најмногу да ги почувствува последиците во текот на есента и зимата 2026/27.

За есента, прогнозата укажува на поизразена зона на низок воздушен притисок над северниот Атлантик. Таа би требало да го засили западното и југозападното струење кон Европа, носејќи потопол воздух од Атлантикот кон централните и северните делови на континентот.

Затоа, за периодот од октомври до декември се предвидуваат температури над просекот во голем дел од Европа, особено во централна, западна и југоисточна Европа, потоа поизразено западно и југозападно струење, а на крајот и повеќе врнежи од просекот во голем дел од континентот поради приливот на влажен атлантски воздух.

Зима 2026/27

Најинтересниот дел од прогнозата се однесува на зимата.

Моделите засега покажуваат доминантно западно струење од Атлантикот, поврзано со длабока циклонска активност над северниот Атлантик. Тоа би можело да донесе температури повисоки од просекот во поголемиот дел од Европа.

Меѓутоа, тоа не значи дека цела Европа би имала топла зима со многу малку или воопшто без снег. Повремени продори на студен воздух од север и северозапад и понатаму се можни. Според прогнозата, повеќе снег би можело да има во северна и североисточна Европа, како и во повисоките предели на централна Европа, додека во остатокот од Европа нема изгледи за долготрајна снежна покривка.

Доколку се остварат актуелните прогнози, Супер Ел Нињо би можел да ѝ донесе на Европа потопла и многу влажна есен во голем дел од континентот, а потоа претежно блага зима поради силното западно струење од Атлантикот, повеќе дожд наместо снег во пониските предели, како и повремени продори на студен воздух и снежни врнежи, особено на северот, североистокот и во повисоките предели.

Важно е да се нагласи дека станува збор за долгорочна прогноза, која никогаш не е толку сигурна како краткорочната, а со оглед на тоа што се работи за прогноза за 4 – 6 месеци однапред, одредени елементи може да се менуваат.