Американскиот претседател Доналд Трамп веќе приватно одлучил дека неговиот потпретседател ЏејДи Венс треба да биде републикански претседателски кандидат на изборите во 2028 година, објави весникот The Washington Post, повикувајќи се на извори запознаени со темата.
Како што забележува весникот, Трамп неодамна им рекол на донаторите на партијата дека би сакал да го види Венс, кој важи за тврдокорен конзервативец меѓу републиканците кој изминатите години беше жесток критичар на либералните политики во Европа, како победник на претседателските избори во 2028 година.
„Советник на претседателот запознаен со разговорот со донаторите рече дека Трамп приватно одлучил дека Венс треба да биде наследник на раководството на Републиканската партија“, пишува The Washington Post.
Притоа се забележува дека американскиот државен секретар Марко Рубио, кого Трамп го спомена како можен републикански претседателски кандидат, се обидува да избегне секаков разговор за претседателските избори во 2028 година.
На почетокот на јули, агенцијата Associated Press, повикувајќи се на помошниците на Рубио, објави дека државниот секретар е подготвен да повлече, доколку потпретседателот одлучи да се кандидира за републиканска номинација на претседателските избори во 2028 година.
Републиканците ќе мора да изберат нов претседателски кандидат пред изборите во ноември 2028 година, бидејќи Трамп, според Уставот на САД, може да служи само два мандата. Меѓу можните кандидати, претседателот во неколку наврати ги споменуваше членовите на неговиот кабинет: Венс, Рубио, министерот за финансии Скот Бесент и поранешната секретарка за внатрешна безбедност Кристи Ноем.
