Голем шумски пожар што избувна во туристичката област Мугла на југозападот од Турција предизвика евакуација на населението, затворање на болницата и прекин на сообраќајот на важна сообраќајница.

Пожарот избувна на земјоделско земјиште во селото Баџир, во округот Сејдикемер, а поради силниот ветер брзо се прошири во блиската шума. Пожарникарите се борат со огнената стихија од воздух и од земја. Според соопштението за медиумите од канцеларијата на гувернерот на Мугла, во гаснењето учествуваат речиси 400 луѓе, пет авиони и 12 хеликоптери, пренесуваат медиумите во регионот.

Како претпазливост, евакуирани се 65 жители од 43 куќи во близина на пожарот. Евакуирани се и пациенти од одделенијата за интензивна нега и палијативна нега на државната болница во Сејдикемер, која се наоѓа на околу 2,5 километри од пожарот.

Поради густата завеса од чад и опасноста од ширење на пожарот, затворен е и автопатот што ги поврзува Анталија и Сејдикемер.

Властите наведуваат дека пламенот и чадот целосно го покриле делот од патот, поради што движењето на возилата во моментов е небезбедно.