Германија за прв пат не успеа да добие место како непостојан член во Советот за безбедност на Обединетите нации, при што Русија имала влијание врз гласањето. Новите членки кои беа избрани се Австрија, Португалија, Зимбабве, Тринидад и Тобаго и Киргистан.
Германскиот министер за надворешни работи Јохан Вадефул изјави дека Русија го охрабрила противењето на кандидатурата на Берлин за непостојано место во Советот за безбедност на Обединетите нации, бидејќи Германија не успеала да биде избрана во ова тело за прв пат.
„Ја поддржуваме Украина. Русија не сака да види таков глас во Советот за безбедност“, рече Вадефул, објави Ројтерс.
Тој изјави дека Москва влијаела на расположението на некои земји-членки против Германија, но не презентираше конкретни докази за ова тврдење.
Гласањето во Генералното собрание на ОН претставува дипломатски неуспех за Берлин, кој очекуваше да добие едно од двете места резервирани за група западноевропски и други земји. За изборите беше потребно двотретинско мнозинство, односно 127 гласа, а Германија доби 104.
Португалија освои 134 гласа, а Австрија 131, со што овие две земји беа избрани за непостојани членки на Советот за безбедност на ОН за мандатот 2027-2028 година.
Вадефул го наведе ставот на Германија кон Израел како една од можните причини за лошиот резултат, или, како што рече, „посебната одговорност на Берлин за Израел“ во контекст на војната на Блискиот Исток.
На 3 јуни, Генералното собрание на ОН избра пет нови непостојани членки на Советот за безбедност. Покрај Австрија и Португалија, беа избрани и Зимбабве, Тринидад и Тобаго и Киргистан.
Новите членки ќе го преземат својот мандат на 1 јануари 2027 година. Советот за безбедност на ОН има 15 членки, од кои пет се постојани – Русија, Кина, Соединетите Американски Држави, Велика Британија и Франција – со право на вето, додека десет непостојани членки се избираат на регионална основа.
