Несреќата се случила за време на вечерна прошетка со пријател, кога девојката скокнала од блиските карпи, по што нејзината нога пропаднала длабоко во мекиот песок од кој не можела сама да се извлече, јавува „ABC“.

На местото биле испратени итните служби откако Џун околу петнаесет минути безуспешно се обидувала да ја ослободи ногата. Спасувачката акција се одвивала во услови на целосен мрак и со надоаѓачка плима.

„Бев многу исплашена“

Поради тоа, морската вода во еден момент ѝ стигнала до половината, а во успешното извлекување учествувале четворица полицајци и петмина пожарникари. При повикувањето помош дошло и до недоразбирање со операторите, кои првично помислиле дека станува збор за заглавен автомобил, а не за лице.

„На почетокот ми беше смешно. Имав чувство како ногата да ми е вакуумирана во кеса, беше многу стегнато. Но, паниката почна да ме обзема кога сфатив колку навистина сум заглавена и дека не можам сама да се извлечам, туку ми е потребна помош. Бев многу исплашена“, изјави Џун.

Девојката јавно го сподели своето непријатно искуство за да ја предупреди јавноста за опасностите што демнат на крајбрежјето, истакнувајќи ја загриженоста за поранливите групи – како што се децата или постарите лица – кои можеби не би имале мобилен телефон или придружба во ваква ситуација.

По овој инцидент, локалните власти на општината Холдфаст Беј поставиле официјални предупредувачки табли на оваа локација, со кои посетителите се предупредуваат на опасноста од жив песок.