Официјалната топка за Светското првенство 2026, наречена „Трионда“ (TRIONDA), носи технологија каква што досега не била користена на мундијалите. Производителот „Адидас“ во соработка со ФИФА вгради сензор од 500 Hz кој собира податоци за движењето на топката дури 500 пати во секунда, овозможувајќи прецизно следење на секој допир, удар и промена на насоката.
Сензорот е сместен во еден од четирите панели на топката и тежи само 14 грама, па според производителот не влијае на балансот и чувството при игра. Благодарение на оваа технологија, судиите и ВАР-системот добиваат податоци во реално време за движењето на топката, што треба да помогне при офсајд ситуации, играње со рака и други спорни моменти.
За разлика од класичните фудбалски топки, „Трионда“ има вградена батерија која мора да биде наполнета пред почетокот на натпреварот. Според достапните информации, батеријата обезбедува околу шест часа работа, доволно за цел натпревар и евентуални продолженија, по што топката повторно треба да се полни за да продолжи да испраќа податоци.
ФИФА ја смета оваа технологија за следен чекор во модернизацијата на фудбалот. Комбинирањето на податоците од топката со камерите на стадионот овозможува создавање тридимензионален модел на играта во живо, што треба да придонесе за побрзи и попрецизни судиски одлуки на Светското првенство кое во 2026 година ќе се одржи во САД, Канада и Мексико.
