Полицијата во Хрватска објави фотографија од Кристијан Алексиќ, осомничен за убиството на 19-годишен доставувач на пица, и упати сериозни предупредувања до граѓаните да не му се приближуваат бидејќи е вооружен и опасен. Се води голема потрага со вклучување на полициски сили и дронови.
Објавена фотографија од опасниот бегалец
Хрватската полиција објави фотографија на Кристијан Алексиќ, роден 1976 година, за кого интензивно се трага од синоќа. Тој е осомничен за убиство на 19-годишен доставувач на пица вчера околу 23:05 часот во Дрниш.
Во потрагата се вклучени сите расположливи полициски сили и техника.
Полицијата предупредува
Полицијата ги предупредува граѓаните да не му се приближуваат доколку го забележат.
„Ги предупредуваме граѓаните, доколку наидат на Кристијан Алексиќ, да не му се приближуваат бидејќи се работи за опасно лице и најверојатно е вооружен со огнено оружје. Во тој случај повлечете се и веднаш јавете се на 192“, соопшти полицијата.
Граѓаните кои имаат корисни информации полицијата ги моли да ги достават на бројот 192, во најблиската полициска станица или на е-пошта sibensko-kninska@policija.hr.
Алексиќ младиот доставувач го убил на терасата од својата семејна куќа, каде што во него испукал повеќе истрели од огнено оружје.
Полицијата го блокирала поширокото подрачје на Дрниш во потрага по бегалецот. Се претпоставува дека Алексиќ се сокрил во густо пошумено подрачје, поради што теренот се пребарува и со помош на дронови.
