Иранскиот претседател Масуд Пезешкијан изјави дека Иран го отфрла јазикот на заканите и никогаш нема да се покори на американското „насилно однесување“.
Пезешкијан го изјави ова вчера во телефонски разговор со ирачкиот премиер Али Фалех ал-Заиџди, за време на кој разговараа за предизвиците со кои се соочуваат земјите од регионот по американско-израелската агресија врз Иран, пренесува „Прештв“.
„Исламската Република Иран е подготвена за каков било дијалог во рамките на меѓународното право, но врз основа на својата вера, верувања и принципи, не се покорила и никогаш нема да се покори на принуда на кој било начин. Ако ни пристапат разумно, дијалогот е можен, но јазикот на заканите и притисоците не води никаде“, рече Пезешкијан за време на разговорот.
„Повикуваме на единство и кохезија на муслиманскиот свет врз основа на религиозните учења и веруваме дека ако се следи правилниот, праведен и фер пат, нема да има причина за несогласувања“, додаде претседателот на Иран, според Танјуг.
САД и Израел започнаа бран воздушни напади врз Иран на 28 февруари.
Иран возврати со ракетни напади и напади со беспилотни летала врз американските бази и интереси во земјите од регионот.
Привременото примирје меѓу Иран и САД, посредувано од Пакистан, стапи на сила на 8 април, но последователните мировни преговори во Исламабад на крајот пропаднаа.
Претседателот на САД, Доналд Трамп, започна операција наречена „Проект слобода“ на 4 мај, во обид да ја преземе контролата врз стратешки важниот воден пат од Иран, кој го затвори Ормускиот теснец по нападите на САД и Израел.
Примирјето на Блискиот Исток е под притисок, откако САД и Иран разменија оган вчера во Персискиот Залив во битката за контрола на Ормускиот теснец.
