Севернокорејскиот лидер Ким Џонг Ун и рускиот министер за одбрана, Андреј Белоусов откриле споменик во Пјонгјанг за Севернокорејците кои загинале борејќи се во војната во Украина, пренесе Би-би-си.
Додека Ким и Белоусов го откривале споменикот и го отворале Меморијалниот музеј, над нив летале воени авиони, а во воздух биле пуштени бели балони.
Не е познато колку севернокорејски војници загинале во борбата против Украина, но јужнокорејските разузнавачки служби проценуваат дека најмалку 15.000 биле испратени да ѝ помогнат на Русија да ги врати деловите од западен Курск.
Сеул проценува дека во војната загинале околу 2.000 Севернокорејци, а ниту Пјонгјанг ниту Русија не објавија официјални бројки.
Се верува дека Северна Кореја добила храна, пари и техничка помош од Москва во замена за испраќање трупи.
Отворањето на Меморијалниот музеј на борбени подвизи во прекуокеански воени операции во неделата се совпадна со она што Русија го опиша како прва годишнина од враќањето на делови од Курск.
Украина започна ненадејна инвазија во Курск во август 2024 година, а една година подоцна Русија соопшти дека повторно воспоставила целосна контрола врз регионот.
Ким го уверувал Белоусов дека Северна Кореја „како и секогаш целосно ќе ја поддржува политиката на Руската Федерација во одбраната на националниот суверенитет, територијален интегритет и безбедносни интереси“ пренесоа државните медиуми.
