Еден од најшокантните моменти на натпреварот се случи во 25. минута, кога играчот од средниот ред на Барселона, Фермин Лопез, доби силен удар во лицето. Голманот на Атлетико, Хуан Мусо, невнимателно го зафати со копачка, по што младиот фудбалер остана да лежи на тревата со обилно крварење.

Ханси Флик нервозно реагираше покрај аут-линијата, лекарите му укажуваа помош на играчот од средниот ред на Барселона, а сцените од теренот беа мачни и за неговите соиграчи.

Потегот на Јамал предизвика лавина реакции

Во исто време, Ламин Јамал се најде на удар на критики на социјалните мрежи. Додека на Лопез му се укажуваше помош, Јамал чекаше изведување на корнер и во еден момент седна на топката, што многумина го протолкуваа како несоодветен потег со оглед на сериозноста на ситуацијата.

Иако претходно токму Јамал му асистираше на Феран Торес за гол, дел од јавноста смета дека во тој момент морал да покаже повеќе емпатија кон својот соиграч.

Барселона застана на чекор до пресврт

Каталонците водеа со 2:0 со головите на Јамал и Торес, но не успеаја да постигнат и трет погодок кој ќе им донесеше целосен пресврт во вкупниот резултат. Атлетико намали преку Адемола Лукман, а тој гол беше доволен за пласман во полуфиналето.

Торес подоцна уште еднаш ја затресе мрежата за 3:1, но погодокот беше поништен поради офсајд. Во завршницата Флик го замени со ветеранот Роберт Левандовски.

Ново европско разочарување

За Барселона ова е ново тешко разочарување во Лигата на шампионите. Откако минатата сезона беше запрена во полуфиналето, а година претходно испадна во четвртфиналето, каталонскиот клуб повторно остана без голем европски исчекор.

Иако Ламин Јамал и понатаму воодушевува со својот талент и учинок, изостанокот на посериозен успех во Европа би можел да влијае и на неговата позиција во трката за „Златната топка“.