„Подготвени сме да одиме напред кон заедничка европска војска, не за десет или дваесет години, туку веднаш. Уште утре, ако можам така колоквијално да се изразам“, изјави тој во Барселона на форумот „European Pulse“, посветен на иднината на Европа.

Санчез смета дека создавањето заедничка војска не е прашање на избор, туку нужност, со оглед на актуелните војни во Украина и на Блискиот Исток, како и тензиите во светот. „Европската Унија се состои од средно моќни држави во областа на одбраната и безбедноста, а како такви можеме да бидеме значајни единствено ако изградиме заедничка војска“, рече Санчез.

Тој напомена дека тоа е неопходно за „другите да не ја користат“ ранливоста на земјите од ЕУ во таа област.

Човекот кој му пркоси на Трамп

Шпанскиот социјалист го изјави тоа во услови на кревко примирје меѓу САД и Иран и во време на нападите на Израел врз Либан, во момент кога Брисел нема големо влијание врз тие случувања. Шпанија претходно го одби барањето на американскиот претседател Доналд Трамп за зголемување на вложувањата во купување оружје на 5 отсто од БДП, колку што побара од сите членки на НАТО.

Мадрид исто така го затвори својот воздушен простор за американски авиони што би можеле да учествуваат во напад врз Иран, а преку своите пристаништа забрани и извоз на оружје за Израел, обвинувајќи ги двете земји дека водат незаконска војна спротивна на меѓународното право.

САД и Израел поради тоа ја критикуваа Шпанија, а Трамп во март ѝ се закани со трговски санкции.

Санчез, кого идната година го очекуваат парламентарни избори, рече во петокот дека вложувањето во заедничката одбрана и безбедност на ЕУ мора да биде проследено со напори и во други области, како што се растот на економијата и поттикнувањето на изградба на повеќе социјални станови.