Потпретседателот на САД, Џеј Ди Венс, ќе ја посети Унгарија следната недела, каде што ќе се сретне со премиерот Виктор Орбан на 7 и 8 април, објави Белата куќа во четврток. Ројтерс првпат објави за планираното патување минатиот месец.
План за посета
Белата куќа соопшти дека Венс ќе одржи и говор за време на престојот во Будимпешта. Посетата на Венс доаѓа само неколку дена пред унгарските избори закажани за 12 април. Се очекува изборите да бидат најтешките за Орбан откако ја презеде власта во 2010 година.
За потсетување, унгарскиот премиер Виктор Орбан предупреди дека Европа се соочува со една од најтешките економски кризи во историјата и повика на итно укинување на санкциите за руските енергетски производи. Во објава на социјалните медиуми, тој рече дека Европа „тоне во криза“ поради глобалните енергетски нарушувања и нагласи дека укинувањето на санкциите би бил единствениот излез од сегашната ситуација.
„Европа мора да ги заштити своите граѓани“
Изјавите на Орбан дојдоа како одговор на критиките од полскиот претседател Доналд Туск, кој го обвини за поткопување на европското единство и дејствување во корист на руските интереси. Туск предупреди на низа потези кои, според него, одат во прилог на Москва, вклучувајќи го и ублажувањето на санкциите и блокирањето на помошта за Украина. Орбан возврати дека Европа пред сè мора да ги заштити своите граѓани и економија, а не да води политики кои, според него, се на нејзина штета.
Позадината на овие политички конфликти е сè поизразената глобална енергетска криза, дополнително влошена од војната на Блискиот Исток. Конфликтот предизвика нарушувања на енергетските пазари, зголемување на цените и дополнително продлабочена несигурност во снабдувањето, поради што европските земји се плашат од сериозни економски последици во наредниот период.
