Слики од Реноар, Сезан и Матис вредни милиони евра се украдени во грабеж на музеј во близина на италијанскиот град Парма, соопшти полицијата. Четири маскирани мажи провалиле во вилата на Фондацијата Мањани Рока на 22 март и украле дела како што се „Les Poissons“ (Риба) од Пјер-Огист Реноар, „Мртва природа со цреши“ од Пол Сезан и „Одалиска на терасата“ од Анри Матис, објави Би-би-си.
Според извештаите на италијанските медиуми, бандата влегла и излегла од вилата во рок од само три минути. Алармниот систем на музејот спречил понатамошна кражба. Крадците ја провалиле главната врата на Вила деи Каполавори, која се наоѓа во руралната околина на Парма, и ги зеле сликите од Француската соба на првиот кат од зградата.
Фондацијата соопшти дека бандата дејствувала „структурирано и организирано“ и имала намера да украде повеќе уметнички дела доколку не се активира аларм и не се повика полиција. Криминалците избегале скокајќи преку ограда, објави регионалната телевизиска станица TGR, која прва ја објави кражбата.
Вкупната вредност на украдените слики се проценува на 9 милиони евра, а само „Les Poissons“ од Реноар вреди 6 милиони евра. Ова ја прави кражбата една од најзначајните кражби на уметнички дела во Италија во последниве години.
Истрагата е во тек
Кражбата ја истражуваат италијанските карабинери и Одделот за заштита на културното наследство во Болоња. Веста за грабежот беше објавена дури во недела. Инцидентот следува по дрскиот грабеж на непроценливи скапоцености од Лувр во Париз на сред бел ден минатиот октомври.
Фондацијата „Мањани Рока“ е основана во 1984 година во семејниот дом на композиторот и колекционер на уметнички дела Луиџи Мањани, по неговата смрт.
