САД ќе дозволат руски танкер полн со нафта да се закотви во Куба, со што ќе се ублажи фактичката нафтена блокада што Вашингтон ја воведе врз островската нација, објави синоќа „Њујорк тајмс“, повикувајќи се на неименуван американски функционер запознаен со ситуацијата.
Американскиот претседател Доналд Трамп воведе нафтена блокада врз Куба во јануари, обидувајќи се да изврши притисок врз владата во Хавана.
Овој месец, Вашингтон привремено ги укина санкциите врз руската нафта за да помогне во ублажувањето на недостигот од снабдување што се појави откако Техеран ја презеде контролата врз Ормускиот теснец по американско-израелскиот напад врз Иран на 28 февруари.
Сè уште не е јасно зошто канцеларијата на американскиот претседател дозволи рускиот танкер да се закотви во Куба, објавува Ројтерс, повикувајќи се на извештај на Њујорк Тајмс.
Танкерот Анатолиј Колодкин, кој е под санкции на САД, влезе во ексклузивната економска зона на Куба во неделата, според податоците за поморскиот сообраќај од Marine Traffic и LSEG, цитирани од Ројтерс, и наскоро би можел да се закотви во пристаништето Матанзас ако не го промени курсот.
Бродот исплови од руското пристаниште Приморск и носи околу 650.000 барели нафта, според податоците, додека извештајот на Њујорк Тајмс дава бројка од 730.000 барели, забележува Ројтерс.
Без оглед на точната бројка, таа количина нафта значително би ја подобрила ситуацијата во Куба, каде што, според претседателот Мигел Дијаз-Канел, не е испорачан ниту еден барел веќе три месеци. Овој недостаток на залихи доведе до строго рационирање на горивото и ја продлабочи енергетската криза што резултираше со серија прекини на електричната енергија низ карипската островска земја, истакнува Ројтерс.
